Një kthesë e bujshme dhe krejtësisht e papritur ka marrë historia e Elton Tozajt, i cili ditët e fundit ishte në qendër të vëmendjes mediatike pas raportimeve alarmante se ishte dhunuar dhe më pas kishte humbur çdo gjurmë.
Teksa rrjeti vlonte nga shqetësimet dhe pikëpyetjet mbi fatin e tij, në mediat rozë po qarkullon një lajm që përmbys gjithçka: emri i Tozajt lidhet drejtpërdrejt me spektaklin “Big Brother VIP Kosova 5”.
Sipas raportimeve të portalit “LajmiShqiptar.al”, që i referohet burimeve të brendshme, gjithçka ka qenë pjesë e një skenari tjetër. Pretendohet se Elton Tozaj ka mbyllur marrëveshjen me producenten Olsa Muhameti për t’u bërë banori më i ri i shtëpisë më të famshme në Kosovë.
Madje, të njëjtat burime hedhin poshtë zërat për pengmarrje apo zhdukje misterioze, duke theksuar se Tozaj pritet t’i bashkohet kastit të reality show-t që nga dita e nesërme.
Megjithatë, deri tani gjithçka mbetet në kuadrin e aludimeve, pasi ende nuk ka asnjë reagim apo konfirmim zyrtar nga produksioni i “Big Brother VIP Kosova”, Olsa Muhameti apo vetë Elton Tozaj. Publikut i mbetet vetëm të presë nëse kjo do të jetë vërtet surpriza e madhe e mbrëmjes së nesërme.








