Erling Haaland ishte protagonisti absolut i mbrëmjes, duke realizuar dy gola në fitoren 2-1 të Norvegjisë ndaj Brazilit në fazën e 1/8-ave të Kupës së Botës 2026. Me këtë sukses historik, norvegjezët sigurojnë për herë të parë në histori një vend në çerekfinalet e turneut.
Pas golit të parë që i dha epërsinë Norvegjisë, Haaland vulosi gjithçka në minutën e 90-të. Sulmuesi mori topin pak jashtë zonës, krijoi hapësirën e nevojshme dhe lëshoi një goditje të fuqishme në cepin e portës, duke mos i lënë asnjë mundësi portierit brazilian Alisson.
“Ishte një gol ku nuk kishte asnjë rast. As gjysmë rasti, as çerek rasti. Vetëm Haaland mund të bëjë diçka të tillë,” komentoi ish-futbollisti Pat Nevin, ndërsa Lee Dixon e përshkroi realizimin si “fuqi e pastër”.
Brazili u përpoq të rikthehej në lojë gjatë pjesës së dytë, por u përball me një Orjan Nyland në formë fantastike. Portieri norvegjez bëri disa pritje vendimtare, përfshirë një ndërhyrje spektakolare në minutën e 86-të, kur devijoi topin në shtyllë dhe ruajti avantazhin e skuadrës së tij.
Në anën tjetër, sulmi brazilian nuk arriti të funksiononte siç pritej. Neymar dhe Vinicius Junior shpesh mbulonin të njëjtat zona të fushës, duke e bërë më të lehtë punën për mbrojtjen norvegjeze.
Me dopietën e Haaland dhe një mbrojtje të hekurt deri në fund, Norvegjia shkruan historinë duke eliminuar një nga favoritët kryesorë të turneut dhe duke siguruar biletën për në çerekfinalet e Kupës së Botës 2026.
Edhe fundi i sfidës solli polemika. Gjyqtari kishte akorduar vetëm shtatë minuta kohë shtesë, por loja vazhdoi përtej këtij limiti. Në minutën e nëntë të shtesës, pra dy minuta pas përfundimit të kohës së akorduar, Brazili fitoi një penallti, të cilën Neymar e shndërroi në gol për rezultatin 2-1. Pas ekzekutimit të penalltisë, ndeshja vijoi deri në minutën e 12-të të shtesës, ku u zhvillua edhe aksioni i fundit, përpara se arbitri të sinjalizonte fundin e takimit.