Kylian Mbappé nuk e fshehu zhgënjimin pas eliminimit të Francës nga Spanja në gjysmëfinalen e Kupës së Botës. Kapiteni i “Les Bleus” pranoi se skuadra e tij ishte larg nivelit të kërkuar dhe e cilësoi paraqitjen si të dobët si në aspektin taktik, ashtu edhe në atë teknik.
“Nuk e luajtëm ndeshjen që donim, as taktikisht, as teknikisht, as në nivelin e përgjithshëm që treguam. Kur nuk bën atë që duhet në një gjysmëfinale të Kupës së Botës, nuk fiton”, deklaroi Mbappé për kanalin francez M6.
Sulmuesi i Real Madridit shpjegoi se plani i Francës ishte të ushtronte presion të lartë për të mos lejuar Spanjën të kontrollonte ritmin e lojës, por gjithçka dështoi që në minutat e para.
“Spanja qëndroi besnike ndaj stilit të saj, duke kontrolluar topin dhe ritmin e ndeshjes. Ne donim t’i vinim nën presion lart, por nuk ia dolëm. Kishte shumë gabime teknike dhe nuk arritëm t’i dëmtonim në momentet kur kishim mundësi”, tha ai.
Mbappé vuri në dukje se Franca vuajti veçanërisht në mesfushë, ku Rodri dhe Fabián Ruiz dominuan falë epërsisë numerike.
“Gjithmonë gjendeshim tre kundër dy në mesfushë dhe kundër Spanjës kjo është shumë e vështirë. Fabián dhe Rodri kishin shumë kohë për të luajtur. Na mungoi komunikimi në presing. Duhej të luanim një kundër një dhe t’i detyronim të vraponin pa top, sepse nuk janë një skuadër që e pëlqen këtë”, theksoi kapiteni francez.
Ai kritikoi edhe mënyrën se si Franca administroi topin, duke pranuar se pasimet dhe prekjet e para nuk ishin në nivelin e një gjysmëfinaleje botërore.
“Edhe kur e fitonim topin, pasimet e para dhe prekjet e para nuk ishin në standardin e një gjysmëfinaleje të Kupës së Botës. Kur i bashkon të gjitha këto, rezultati është humbja”, u shpreh ai.
Në fund, Mbappé mori mbi vete përgjegjësinë si kapiten i ekipit dhe foli për zhgënjimin e madh që ndjen skuadra.
“Si kapiten, i marr të gjitha përgjegjësitë dhe nuk kam asnjë problem me këtë. Donim të shkonim në finale dhe t’i jepnim vendit tonë mundësinë të ëndërronte e të shkruante histori. Ka një zhgënjim të madh, të cilin nuk mund ta përshkruaj me fjalë. Tani duhet të rikuperohemi, të pushojmë dhe të ecim përpara. Futbolli nuk pret askënd”, përfundoi Mbappé.