Lidhja mes Ferma VIP ish-konkurrentëve Adionit dhe Fabjolës, e njohur ndryshe si Ola, po bëhet çdo ditë e më serioze pas përfundimit të rrugëtimit të tyre në “Ferma VIP 3”. Ajo që nisi si një romancë brenda formatit televiziv, tashmë duket se po shndërrohet në një histori reale dashurie, me hapa konkretë drejt së ardhmes.
Pak ditë më parë, Adioni surprizoi ndjekësit në rrjetet sociale kur zbuloi se kishte udhëtuar drejt Malësisë së Madhe për të takuar familjen e Olës. Jo vetëm kaq, por ai tregoi se kishte marrë aprovimin e tyre dhe kishte kërkuar zyrtarisht dorën e partneres, duke ngritur menjëherë dyshimet se çifti po mendon seriozisht për martesë.
Ndërkohë, duket se tashmë ka ardhur radha e një tjetër momenti të rëndësishëm në lidhjen e tyre. Këtë herë ishte Ola ajo që bëri hapin domethënës, duke udhëtuar drejt Kosovës, në vendlindjen e Adionit në Gjakovë, për të takuar familjen e tij.
Nga fotografia e publikuar në InstaStory, çifti shfaqet i ulur në tryezë pranë prindërve të Adionit, mes buzëqeshjesh dhe një atmosfere mjaft të ngrohtë familjare. Pamjet kanë marrë menjëherë vëmendjen e ndjekësve, të cilët po e komentojnë si një tjetër sinjal të fortë se marrëdhënia e tyre po hyn në një fazë shumë më serioze.
Vizitat tek familjet respektive dhe formalizimi i hapave mes tyre po bindin publikun se romanca e Adionit dhe Olës nuk ka mbetur thjesht një histori reality show, por një lidhje e ndërtuar me përkushtim dhe plane konkrete për të ardhmen.