Marrja e pasaportës shqiptare nga Elia Caprile ka ngritur pikëpyetjen nëse portieri i Cagliarit mund të bëhet pjesë e Kombëtares shqiptare. Megjithatë, mediat italiane kanë rikthyer në vëmendje rregulloret e FIFA-s, të cilat mund ta bëjnë të vështirë kalimin e tij te kuqezinjtë.
Sipas Sportmediaset, një precedent i ngjashëm është ai i mesfushorit Vitaly Janelt, për të cilin ishte diskutuar mundësia e përfaqësimit të Bosnjës për shkak të lidhjeve familjare. Megjithatë, FIFA nuk e lejoi ndryshimin e përfaqësueses dhe lojtari përfundoi duke debutuar me Gjermaninë.
Ky rast ka rikthyer diskutimet edhe për Caprile, i cili ka marrë shtetësinë shqiptare përmes një dekreti të presidentit Bajram Begaj, të firmosur më 19 tetor. Lidhja e tij me Shqipërinë vjen përmes bashkëshortes, Emili Toshkollari, e cila është me origjinë shqiptare.
Por pasaporta shqiptare nuk i garanton automatikisht të drejtën për të luajtur me Kombëtaren. Për këtë, portieri duhet të plotësojë kriteret e përcaktuara nga FIFA, të cilat lidhen jo vetëm me shtetësinë, por edhe me kushtet e posaçme për përfaqësimin ndërkombëtar.
Një nga çështjet që kërkon shqyrtim është fakti se Caprile nuk ka prejardhje shqiptare dhe lidhja e tij e njohur me vendin është përmes bashkëshortes. Kjo e bën të domosdoshëm verifikimin nëse ai përmbush kriteret përkatëse të FIFA-s.
Një tjetër element është e kaluara e tij me përfaqësueset italiane. Portieri ka luajtur me Italinë U-18 dhe U-21, ndërsa më 7 nëntor 2025 u grumbullua edhe nga trajneri i atëhershëm i Kombëtares A, Gennaro Gattuso.
Megjithatë, Caprile nuk është aktivizuar në asnjë ndeshje me ekipin e parë të Italisë. Kjo do të thotë se historia e tij me përfaqësuesen A nuk e përjashton vetvetiu një ndryshim të mundshëm, por as nuk garanton se një kalim te Shqipëria do të miratohej.
Për momentin, marrja e shtetësisë shqiptare përbën një hap në aspektin ligjor, ndërsa mundësia që “dhëndri italian” të veshë fanellën kuqezi mbetet e paqartë dhe varet nga plotësimi i kritereve sportive dhe vlerësimi përfundimtar i FIFA-s.
