Angela Martini në qendër të thashethemeve për ndarje: Postimi i fundit në Instagram ndez debatet në rrjet
Supermodelja shqiptare me famë ndërkombëtare, Angela Martini, është rikthyer sërish në titujt e mediave rozë pas raportimeve për një ndarje të mundshme nga bashkëshorti i saj. Portali i njohur amerikan TMZ publikoi së fundmi një artikull ku pretendohet se çifti po i jep fund martesës, duke hapur menjëherë diskutime dhe komente të shumta në rrjetet sociale.
Derisa lajmi për divorcin po qarkullon me shpejtësi, Angela nuk ka dhënë ende asnjë deklaratë zyrtare për statusin e marrëdhënies. Megjithatë, ajo ka zgjedhur të komunikojë ndryshe me publikun, përmes një postimi emocional në Instagram.
Në ditëlindjen e djalit të saj, Kyree Martini Savulescu, modelja publikoi një urim të gjatë e të ndjerë, ku e përshkruan të birin si “zemra dhe shpirti ynë” dhe “dhurata jonë më e madhe”. Postimi i saj vjen i mbushur me tone familjare dhe mesazhe të forta dashurie.
Në mesazhin e saj, Angela Martini shkruan:
“Ti je fëmija që ne zgjodhëm… dhe disi fëmija që na zgjodhi edhe neve. Mrekullia jonë. Gjithçka jonë. Gëzuar ditëlindjen, Kyree. Të duam pa fund.”
Ajo shoqëroi urimin me një seri fotografish, ku bie në sy edhe një imazh i bashkëshortit me djalin. Ky detaj ka shkaktuar shumë reagime, pasi publikimi vjen vetëm pak ditë pas lajmit për ndarje, duke ngritur pyetje mbi statusin e vërtetë të marrëdhënies.
Ndërsa disa e shohin praninë e bashkëshortit në foto si një sinjal bashkimi dhe si dëshmi se çifti vazhdon të funksionojë si njësi familjare për të mirën e fëmijës, të tjerë mbeten të rezervuar derisa Angela Martini të publikojë një qëndrim të qartë.
Për momentin, gjithçka mbetet në nivel raportimesh, ndërsa publiku vijon të ndjekë nga afër zhvillimet për njërën prej figurave më të përfolura të showbiz-it shqiptar.